Bandaríski hermaðurinn Bradley Manning þarf að koma fyrir herdómstól í landinu vegna gruns um að hafa lekið mikilvægum öryggisupplýsingum til Wikileaks.

Gögnin sem um ræðir urðu til þess að vekja gríðarlega athygli á stríðinu í Írak sem og upplýsingasíðunni Wikileaks. Meðal þeirra gagna sem Manning á að hafa afhent Wikileaks er þekkt myndband af þyrluflugmönnum að skjóta á fólk á götum úti.

Manning er 24 ára greiningarsérfræðingur sem gegndi herþjónustu í Írak. Verði hann dæmdur fyrir hið meinta brot gæti hann átt yfir höfði sér lífstíðarfangelsi en hann er sakaður um að hafa lekið þúsundum skjala til Wikileaks og þar með „aðstoðað óvininn“ líkt og segir í ákærunni, samkvæmt frétt BBC.

Manning var handtekinn í maí árið 2010 í tengslum við upplýsingalekann.

Enn er ekki búið að ákveða hvenær hann kemur fyrir herréttinn. Næsta verkefni er að velja dómara.

Í yfirlýsingu frá bandaríska hernum segir að Manning hafi haft á tölvudiski yfir 500 þúsund trúnaðarskjöl sem og upplýsingar um Julian Assange, forsprakka Wikileaks.

Í einu skjalanna sem lögð verða fyrir herréttinn skrifar Manning að trúnaðarskjölin séu með „mikilvægustu gögnum samtímans sem svipta hulunni af stríðinu og sýna hið rétta andlit hermennsku 21. aldarinnar.“