Vespur í frosti og snjó í Róm. Reuter

Fleiri en 260 var bjargað í dag af ferju sem strandaði á Ítalíu vegna snjóstorms. Þá áttu björgunarsveitir landsins fullt í fangi með að aðstoða fólk fast í bílum og lestum í frosti og snjó en veðrið undanfarið hefur verið nokkuð frábrugðið því sem Ítalir eiga að venjast.

Shardon-ferjan strandaði stuttu eftir að hún lagði úr höfn í Civitavecchia, nálægt Róm, og greip mikill ótti um sig meðal farþega en ekki er mánuður liðinn frá því að 32 létust þegar skemmtiferðaskipið Costa Concordia sigldi á sker og fór á hliðina við vesturströnd landsins.

Landhelgisgæslan náði þó að koma öllum frá borði heilum á húfi að þessu sinni.

Mikið snjófall gerði talsverðan usla í Róm og var skólum lokað víðast hvar í mið- og norðurhluta Ítalíu vegna kuldaveðursins. 150 sátu fastir í lestarvagni í tíu tíma í nótt og þá var 20 bjargað úr föstum bílum nálægt höfuðborginni og tveir færðir á spítala.

Héraðsyfirvöld í Tuscany voru með mikinn viðbúnað vegna rafmagnsleysis en hitastigið fór niður fyrir -10 gráður í sumum hlutum þess.

Miklar seinkanir urðu á lestum milli Flórens og Bologna og var fleiri en 40 brottförum frá Fiumicino-flugvellinum í Róm frestað.