Yoweri Museveni forseti Úganda. Reuters

Forseti Úganda, Yoweri Museveni, fullyrti í dag að hann væri ekki hlynntur ofsóknum gegn samkynhneigðum í landi sínu, þrátt fyrir að alræmt frumvarp gegn samkynhneigð hafi að nýju verið lagt fyrir þingið í síðustu viku.

Museveni var gestur breska spjallþáttarins Hard Talk á BBC. Hann sagði þar að hann teldi samkynhneigð ekki vera eðlilega, en það mætti samt umbera hana ef henni væri ekki flíkað. „Samkynhneigðir hafa, í litlum mæli, verið til í okkar hluta svörtu Afríku," sagði forsetinn í viðtalinu.

„Þeir hafa aldrei verið ofsóttir eða sætt mismunun, en munurinn á okkur og Vestur-Evrópu er að þar er samkynhneigð hampað eins og hún sé af hinu góða." Þingmaðurinn sem mælti fyrir frumvarpinu sem vakti svo hörð viðbrögð um allan heim fyrir skömmu segist nú vilja leggja það fram aftur í breyttri mynd, þar sem ákvæði um dauðarefsingu við samkynhneigð hafi verið felld út.

Forsetinn sagði aðspurður að ævilangur fangelsisdómur kæmi aðeins til greina fyrir glæpi sem væru „gegn hagsmunum samfélagsins". Hann bætti því við sem dæmi að lífstíðardómur kynni að falla gegn hverjum þeim sem styðji við ráðabrugg um að múta börnum til að verða samkynhneigð.

Barack Obama Bandaríkjaforseti hefur lýst frumvarpinu sem ógeðslegu, en Museveni varar vestræna leiðtoga við því að „fara varlega gagnvart svörtu Afríku" og troða ekki eigin gildum upp á þjóð hans. „Ég borða ekki fisk vegna þess að ég kalla þá snáka. Ég borða ekki kjúkling því ég tel að það komi þér úr jafnvægi. Ég borða ekki svín - ég borða ekki margt af því sem þið borðið en ég held því bara fyrir mig," sagði hann.