Óánægður starfsmaður tæknifyrirtækis í fjármálahverfi Chicago í Bandaríkjunum ruddist þar inn í morgun og skaut á yfirmann sinn áður en hann skaut sig sjálfan.
Yfirmaðurinn sem var skotinn í höfuðið er forstjóri og stofnandi fyrirtækisins og hlaut hann höfuðáverka og liggur nú þungt haldinn á spítala. Árásarmaðurinn lést á staðnum.
Niðurskurður hafði verið í fyrirtækinu og hafði árásarmaðurinn, ásamt nokkrum öðrum starfsmönnum, verið lækkaður í stöðu fyrr í vikunni. Það var á tíunda tímanum í morgun sem hann gekk inn í fyrirtækið og bað um fund með yfirmanninum. Þar tók hann upp byssu og börðust þeir um hana í nokkra stund áður en skotum var hleypt af.
Maðurinn sem var skotinn heitir Steven Lavoie og stofnaði fyrirtækið, ArrowStream, árið 2000.
CBS Chicago greinir frá þessu.