Voltaire Gazmin, varnarmálaráðherra Filippseyja, segir að uppreisnarmenn á sýrlenska hluta Gólanhæða hafi ráðist á filippseyska friðargæsluliða Sameinuðu þjóðanna.. Hann segir að árásin hafi hafist snemma í morgun en hann hefur ekki greint frá mannfalli.
Sýrlenskir uppreisnarmenn hafa að undanförnu tekið 44 friðargæsluliða frá Fijií gíslingu á svæðinu. Einnig umkringdu þeir eftirlitsstöð 75 friðargæsluliða frá Filippseyjum, en um tvær stöðvar er að ræða.
Þá hafa uppreisnarmennirnir náð landamærastöð sem liggur á ísraelska hluta Gólanhæða á sitt vald, að því er segir á vef BBC.
Talið er að uppreisnarmennirnri tilheyri al-Nusra fylkingunni, sem nýtur stuðnings al-Qaeda hryðjuverkasamtakanna.