Yfirvöld í Frakklandi hafa lýst yfir neyðarástandi vegna náttúruhamfara í um 60 frönskum borgum og bæjum í suðurhluta Frakklands. Bæirnir eru á kafi í kjölfar úrhellisrigningar og er borgin Montpellier þar á meðal.
Vegir og hraðbrautir eru undir vatni eftir að áin Lez fór að flæða yfir bakka sína skammt í héraðinu Languedoc-Roussillon. Úrkomumet hafa verið slegin á svæðinu.
Franska veðurstofan segir að mæld úrkoma á nokkrum klukkustundum í Montpellier jafngildi meðalúrkomu á sex mánaða tímabili. Um 300 millimetrar féllu í gær og sló það met sem var sett árið 1957.
Ríflega 4.000 manns hafa þurft að leita skjóls í skólum eða miðstöðvum sem hafa verið settar upp fyrir íbúana. Margir sitja sömuleiðis fastir á flugvöllum og á lestarstöðvum.
Björgunarsveitir voru kallaðar út rúmlega 1.200 sinnum og hafa þrjár þyrlur aðstoðað við björgun.
Innanríkisráðherra Frakklands, Bernard Cazeneuve, sagði í dag að gripið hafi verið til ráðstafana í héraðinu vegna náttúruhamfara. Hann mun heimsækja svæðið síðar í dag.
Búist er við að það muni draga úr úrkomunni í dag. Veðurfræðingar höfðu gefið út rauða viðvörun, sem er efsta stig vegna úrkomu og flóðahættu, en er nú búnir að lækka hana um eitt þrep, eða niður í appelsínugult.
Ekki hafa borist fréttir af dauðsföllum.
Svona var staðan í Montpellier í gær líkt og sjá má í meðfylgjandi myndskeiði.