Neitar nauðgun en sér eftir framhjáhaldi

Enski knattspyrnumaðurinn Ched Evans segist vera saklaus af nauðgun en viðurkennir að hafa haldið fram hjá unnustu sinni. Evans var látinn laus úr fangelsi á föstudag eftir að hafa afplánað helming refsingarinnar sem hann hlaut fyrir nauðgun árið 2012.

Evans var dæmdur í fimm ára fangelsi í apríl 2012 fyrir að hafa nauðgað nítján ára gamalli konu á hótelherbergi í Wales. Hann viðurkenni að hafa átt mök við stúlkuna en segir að það hafi verið með hennar vilja. Unnusta hans, Natasha Massey, hefur varið hann allan tímann, og eru þau enn par.

Hefði aldrei átt að halda framhjá

Í viðtali við Mirror on Sunday um helgina segist hann sjá eftir öllu og hann vildi óska þess að hann gæti snúið klukkunni til baka. Hann segir að kynmökin hafi verið með vilja konunnar en hún  sagði við réttarhöldin á sínum tíma að hún væri minnislaus um hvað gerðist. Tekið er fram í greininni að Evans minnist ekki einu orði á fórnarlambið og það sem hún hafi þurft að þola.

„Þetta var eitthvað sem aldrei átti að gerast. Og það er eitthvað sem ég mun sjá eftir alla mína ævi. Ég hélt framhjá unnustu minni og hafði kynmök með þessari stúlku - en það var svo sannarlega með hennar vilja,“ segir Evans í viðtalinu.

Fórnarlambið varð fyrir svo alvarlegu áfalli að það endaði með því að lögreglan kom henni fyrir annars staðar í Bretlandi og hún fékk nýtt nafn eftir að hún var nafngreind á Twitter.

Katie Russell, hjá Rape Crisis, sagði um helgina að sú eina sem Evans ætti að biðja afsökunar sé konan sem hann nauðgaði.

Var dauðadrukkin og man ekkert

Í Guardian kemur fram að við réttarhöldin hafi komið fram hjá saksóknara að unga konan hafi verið svo drukkin að það sé ekki möguleik á að hún hafi haft kynmök við Evans af fúsum og frálsum vilja.

Evans, sem var leikmaður Sheffield United, segir að hann hafi alltaf talið við réttarhöldin að málinu yrði vísað frá og það hafi komið honum gjörsamlega í opna skjöldu þegar hann var dæmdur sekur.  

Tæplega 150 þúsund hafa ritað undir beiðni um að Evans fái að snúa aftur í ensku knattspyrnudeildina og birti Sun jafnvel frétt um að Sheffield væri búið að ganga frá samningi þar að lútandi en stjórnendur félagsins sögðu ekkert hæft í þeirri frétt.

Fjölskylda Evans hefur gagnrýnt harðlega hvernig fjallað hefur verið um mál hans en umfjöllun um mál hans hefur verið á báða bóga - ef einhver hefur afplánað dóm fyrir nauðgun má hann snúa aftur til fyrri starfa? 

Áttu rétt á að snúa aftur til vinnu eftir að afplána nauðgunardóm?

Í viðtali við CNN spyr Polly Neate, yfirmaður Womens Aid, um hvaða skilaboð það séu ef Evans muni leika knattspyrnu á ný með Sheffield. Það sé á ábyrgð knattspyrnufélagsins að taka slíka ábyrð. Er það eitthvað sem félagið vill láta tengja við nafn sitt - að vera með knattspyrnumann á sínum snærum sem var dæmdur í fimm ára fangelsi fyrir nauðgun þrátt fyrir að halda því fram að hann hafi ekki gert neitt rangt.

Auk Evans viðurkenndi knattspyrnumaðurinn og vinur Evans, Clayton McDonald, að hafa átt kynmök við fórnarlambið en hann var hins vegar sýknaður af ákæru um nauðgun. 

Sjónvarpskynnirinn og stuðningsmaður Sheffield United, Charlie Webster, sem sagði frá því fyrr á árinu að henni hafi verið nauðgað þegar hún var unglingur, segir að hún muni hætta að vinna fyrir klúbbinn verði gerður samningur við Evans á nýjan leik. Hún segir að á meðan hún starfi fyrir félagið þá ætli hún ekki að upplifa það að ungt fólk fagni því þegar þessi maður skorar mörk.