Í það minnsta tveir létu lífið, þar af einn lögreglumaður, og tíu manns særðust í sprengjuárás í borginni Kharkiv í austurhluta Úkraínu í dag. Sprengjan sprakk í miðborg Kharkiv um miðjan dag þar sem fjöldi manna var kominn saman til að minnast þess að eitt ár er liðið frá óeirðunum á Maiden-torgi í Kænugarði, höfuðborg Úkraínu.
Óeirðirnar urðu til þess að Viktor Janúkovítsj var steypt af stóli sem forseta Úkraínu.
Kharkiv er næststærsta borg Úkraínu.
Bæði stjórnvöld í Úkraínu og aðskilnaðarsinnar í austurhluta landsins hafa samþykkt að flytja þungavopn sín frá víglínunni í samræmi við vopnahléið sem er í gildi, eins og fram hefur komið.