Kona í Hong Kong var í dag dæmd í sex ára fangelsi fyrir að hafa beitt indónesíska þernu, sem starfaði á heimili hennar, ofbeldi.
Þegar dómarinn las upp dóminn í morgun hvatti hann til þess að lögum verði breytt þannig að erlent farandverkafólk búi við meira öryggi.
Konan, Law Wan-tung, var dæmd sek um 18 ákæruatriði af 20, þar á meðal að hafa veitt þernunni alvarlega áverka, svikið hana um laun og brotið gegn henni á ýmsan hátt.
Mál þernunnar, Erwiönu Sulistyaningsih, vakti heimsathygli á síðasta ári er hún var lögð inn á sjúkrahús við komuna heim vegna alvarlegra áverka sem Law hafði veitt henni.
Sulistyaningsih sagði við dómsuppkvaðninguna vera ánægð og þakklát dómnum en hún teldi að sex ár væri ekki nægjanlega langur dómur.
Amnesty International hefur vakið athygli á því að þernur séu í raun þrælar í Hong Kong og þurfi oft að þola grimmilegar aðstæður í starfi sínu. Fólkið er lokkað til starfa með gylliboðum. Dæmi eru um að skilríki þeirra séu síðan tekin og það látið vinna óhóflega fyrir mjög lág laun.
Dómarinn, Amanda Woodcock, sagði þegar hún kvað upp dóminn að Law Wan-tung hafi ekki sýnt Sulistyaningsih eða öðru útlendu starfsfóli vott af samúð. „Law leit niður á starfsfólk sitt,“ sagði Woodcock.
„Það er sorglegt að þetta framferði er ekki sjaldgæft og því miður endar það oft sem sakamál.“
Dómarinn hvatti yfirvöld í Hong Kong og Indónesíu til þess að rannsaka vinnumiðlarnir sem láta atvinnuleitendur greiða háar fjárhæðir í þóknanir sem eru síðan dregnar af launum þeirra.
Var eins og skugginn af sjálfri sér
Þegar hún ræddi um meðferðina á Sulistyaningsih sagði hún að þernan hafi fengið litla hvíld, svefn og næringu sem gerði það að verkum að hún leit út eins og skugginn af sjálfri sér.
Sulistyaningsih, 24 ára, lýsti því við réttarhöldin í desember hvernig hún hafi fengið eitthvað smávegis af brauði og hrísgrjónum að borða, hún hafi sofið fjóra tíma á sólarhring og misþyrmt svo hrottalega af Law að hún missti meðvitund.
Við réttarhöldin kom fram hvernig Law, sem er tveggja barna móðir á fimmtugsaldri, hafi breytt einföldum heimilistækjum í vopn. Til að mynda kútum, herðatrjám og reglustikum.
Woodcock gerði aðstæður þerna að umtalsefni við dómsuppkvaðninguna. Það að þær þurftu að búa á heimilum vinnuveitenda gerði þær að skotspæni árása og þær sætu fastar í gildrunni. því þær gætu ekki farið eitt eða neitt því þær verði að greiða skuld sína við vinnumiðlunina.
Myndir af Sulistyaningsih frá sjúkrahúsinu í Indónesíu í janúar í fyrra snertu marga og beindu kastljósinu að ömurlegum aðbúnaði þerna frá Filippseyjum og Indónesíu í Hong Kong. Þar starfa um 300 þúsund þremur frá þessum löndum.