Búið er að lýsa yfir neyðarástandi í Baltimore í Bandaríkjunum þar sem átök hafa geisað á milli mótmælenda og lögreglu í kvöld. Þjóðvarnarliðið hefur verið virkjað til að aðstoða lögreglu. Blökkumaðurinn Freddie Grey var borinn til grafar fyrr í dag.
Mótmælendur hafa eyðilagt bíla og rænt verslanir í Baltimore í dag. Að minnsta kosti sjö lögreglumenn eru slasaðir og er einn þeirra meðvitundarlaus. Ungmenni kasta múrsteinum og flöskum að lögreglu og hafa þau einnig kveikt í bílum, meðal annars lögreglubílum.
Lögregla, bæði í Baltimore og frá fleiri stöðum í Maryland-ríki, reynir á ná stjórn á ástandinu og hefur meðal annars beitt táragasi. Ungmenni hafa einnig ráðist á fréttaljósmyndara.
Átökin hófust skömmu eftir útför Grey en mörg þúsund manns vottuðu honum virðingu sína í og við kirkju í Sandtown-hverfinu. Mótmælt hefur verið á hverju kvöldi frá því hann lét lífið í haldi lögreglu og hefur fjölskylda hans beðið mótmælendur að láta af ofbeldinu.