Måns Zelmerlöw fæddist í Lundi í Svíþjóð 13. júní árið 1986. Hann er poppsöngvari og þáttastjórnandi en í kvöld mun hann hugsanlega einnig státa af því að hafa sigrað í Eurovision í Vínarborg í Austuríki árið 2015.
Svíar hafa staðið sig vel í Eurovision í gegnum árin. Fimm sinnum hafa þeir fagnað sigri og nú er svo komið að mörg hinna landanna nýta sér krafta sænskra sönglagahöfunda. Síðustu vikur hefur sænska lagið Heroes trónað á toppi lista veðbanka en ljóst er að Ítalía og Rússland munu veita því harða samkeppni.
Zelmerlöw tók tvisvar þátt í sænsku forkeppninni fyrir Eurovision, Melodifestivalen, áður en hann fór loks með sigur af hólmi í ár. Í heimalandi sínu er hann þekktastur fyrir að hafa tekið þátt í sænska Idolinu árið 2005.
Móðir Zelmerlöw er prófessor við háskólann í Lundi og faðir hann er skurðlæknir. Zelmerlöw lagði stund á tónlistarnám í Lundi með áherslu á kórsöng. Hann á eina yngri systur og hefur mjög gaman af því að spila fótbolta, tennis og golf.
Zelmerlöw hefur átt labradorhundinn Messi frá því í mars árið 2013 en þeir hafa meðal annars tekið þátt í sjónvarpsauglýsingu saman.
Zelmerlöw var í fríi ásamt fjölskyldu sinni á Khao Lak á Taílandi þegar jarðskjálftinn mikli varð skammt frá eyjunni Súmötru í Indlandshafi á annan dag jóla árið 2004. Þau lifðu öll af.
Texti Heroes fjallar um barnæsku hans en hann átti í erfiðleikum með að eignast vini. Hann átti sér þó einn bandamann. Þegar Zelmerlöw flytur framlag sitt á sviðinu má meðal annars sjá teiknaðri fíguru bregða fyrir, hugsanlega ímynduðum vini.
„Ég er hamingjusamur og mér er létt. Og ég er spenntur fyrir laugardagskvöldinu. En nú skulum við fagna þessu aðeins. En bara smá, ég lofa,“ sagði Zelmerlöw á blaðamannafundi eftir seinni undanúrslitin í gærkvöldi.
Háværar raddir hafa verið um að lag Zelmerlöws sé stolið, eða að það líkist lagi Davids Guetta, Lovers on the sun, í það minnsta mjög mikið. Var hann spurður um þetta á blaðamannafundinum og sagði hann að uppbygging laganna væri svipuð. „Ef maður greinir tónana þá eru ekki tveir tónar sem eru líkir,“ sagði sænski söngvarinn.
Hér má hlýða á lag Davids Guetta:
Zelmerlöw ætlar sér á toppinn á laugardag en sagðist í viðtali við Expressen helst óttast samkeppni ítalska tríósins.
Í ár tekur Svíþjóð þátt í Eurovision í 55. skipti og hefur landið aðeins fimm sinnum verið fjarri góðu gamni. Svíar hafa oftast unnið keppnina, eða fimm sinnum. Landið fór síðast með sigur af hólmi árið 2012 og hefur tvisvar hafnað í neðsta sæti.
Svíðþjóð svindlaði! Það voru miklu fleiri en 6 manns á sviðinu! #12stig pic.twitter.com/79h5l1U73k
— Ari Eldjárn (@arieldjarn) May 21, 2015
Árið 2014 olli Zelmerlöw miklu uppnámi í Svíþjóð þegar hann hélt því fram í matreiðsluþætti að samkynhneigt kynlíf væri ónáttúrulegt. Samkvæmt breska vefnum Pink News sagði söngvarinn orðrétt: „Það er ekki eðlilegt fyrir karlmenn að vilja sofa hver hjá öðrum“ og setti þá aðra þátttakendur hljóða.
Nú hefur hann sagt að hann gæti vel hugsað sér að hitta karlmann í rómantískum tilgangi. Zelmerlöw var spurður hvort hann gæti séð fyrir sér að eiga stefnumót við karlmann af sænska miðlinum Metro og svaraði hann játandi. „Já, ef mér líður þannig – algjörlega, ég gæti gert það,“ sagði söngvarinn.
Zelmerlöw hefur beðist afsökunar á orðum sínum og unnið með sænskum hópum sem berjast fyrir réttindum hinsegin fólks og er hann sagður undirstrika breytta afstöðu sína enn frekar með svari sínu við fyrirspurn Metro.
Hér má hlýða á órafmagnaða útgáfu lagsins Heroes:
Måns Zelmerlöw sjunger Heroes akustiskt! Vad tycker ni?!
Posted by SVT Melodifestivalen on Monday, May 18, 2015