Bandarísk yfirvöld hafa farið fram á það við stjórnvöld í Sviss að framselja sjö stjórnarmenn í Alþjóðaknattspyrnusambandinu (FIFA) sem handteknir voru í maí vegna rannsóknar á spillingu innan sambandsins.
Stjórnarmennirnir sjö eru á meðal 14 stjórnenda FIFA sem grunaðir eru um spillingu. Umfangsmikil rannsókn hefur farið fram hjá alríkislögreglu Bandaríkjanna, FBI.
Stjórnarmennirnir voru handteknir aðeins tveimur dögum fyrir aðalþing knattspyrnusambandsins, grunaðir um margs kyns afbrot. Mennirnir eru meðal annars sakaðir um peningaþvætti, fjárglæfrastarfsemi og rafræn fjársvik á undanförnum tuttugu árum.
Snúa afbrotin meðal annars að kosningunni um hvaða land fengi að halda heimsmeistaramótið í knattspyrnu árið 2010 og mútur í tengslum við heimsmeistaramótið í Frakklandi árið 1998. Eins og fram hefur komið samþykktu stjórnarmenn meðal annars mútur í aðdraganda HM 2010 til að sjá til þess að mótið yrði haldið í Suður-Afríku.
Það voru bandarísk yfirvöld sem fóru með rannsókn málsins en stjórnendur FIFA eru sakaðir um að hafa þegið tugi milljóna Bandaríkjadala í mútur undanfarna áratugi.