Josh Greenberg, annar tveggja stofnenda tónlistarveitunnar Grooveshark, fannst í gær látinn á heimili sínu aðeins 28 ára gamall.
Lögreglan í bænum þar sem hann bjó segir að ekkert glæpsamlegt hafi átt sér stað, né heldur sé um sjálfsvíg að ræða.
Í apríl á þessu ári var vefsíðu Grooveshark lokað vegna málaferla fjölda tónlistarframleiðenda gegn henni. Dómstóll í Bandaríkjunum komst svo fyrir stuttu að því að vefsíðan væri bótaskyld. Alls á hún yfir höfði sér 736 milljóna dollara skaðabótakröfu.
Þegar mest lét störfuðu 145 manns hjá vefsíðunni. Þegar henni var lokað skrifuðu stofnendur síðunnar á síðu félagsins: „Þrátt fyrir að við höfum verið í góðri trú gerðum við alvarleg mistök. Við sóttum ekki um leyfi til að birta fjölda tónverka. Það var illa gert af okkur og við biðjumst afsökunar.“