Tveir voru drepnir og að minnsta kosti sjö særðust þegar byssumaður hóf skothríð á bar og nærliggjandi kaffihúsi í miðborg Tel Aviv í Ísrael.
Lögreglunni hefur ekki tekist að hafa hendur í hári byssumannsins.
Enginn hefur lýst ábyrgð á verknaðinum á hendur sér en töluvert hefur verið um árásir Palestínumanna á Ísraela að undanförnu.
„Lögreglan leitar vítt og breitt um Tel Aviv að byssumanninum. Allir þeir sem særðust voru fluttir á sjúkrahús í Tel Aviv,“ skrifaði talsmaður lögreglunnar á Twitter.
Haim Pinto var að loka skartgripaverslun sinni, skammt frá barnum, þegar hann heyrði skotárásina. „Fólk byrjaði að hlaupa í áttina til mín og hrópaði „hryðjuverkamaður, hryðjuverkamaður“. Ég fór aftur inn í verslunina og stúlka kom þá inn og við földum okkur á baðherberginu þangað til skotárásinni lauk,“ sagði Pinto.