Bandarísk lögreglukona var skotin til bana á fyrsta degi hennar í starfi. Hún var aðeins 29 ára gömul.
Ashley Guindon hafði brugðist við útkalli vegna heimlisofbeldis í Woodbridge í Virginíu þegar hún var skotin. Tveir lögreglumenn til viðbótar særðust í árásinni og voru þeir fluttir á sjúkrahús. Ekki liggur fyrir hversu alvarlega þeir særðust.
Árásarmaðurinn, sem er hermaður, er nú í haldi lögreglu. Hann slapp ómeiddur, að því er segir á vef breska ríkisútvarpsins.
Maðurinn er grunaður um að hafa orðið eiginkonu sinni að bana og þegar lögreglumenn komu á vettvang hóf maðurinn skothríð.
Lögreglan segir að barn hafi verið í húsinu þegar þetta gerðist.
Skömmu áður en þetta gerðist hafði lögreglan í Prince William-sýslu birt mynd á Twitter þar sem greint er frá því að Guindon hefði hafið störf og var hún og samstarfsfélagi hennar hvött til að fara varlega.
Welcome Officers Steven Kendall & Ashley Guindon who were sworn in today & begin their shifts this weekend.Be safe! pic.twitter.com/92c2YLjcQx
— Prince William Co PD (@PWCPoliceDept) February 26, 2016