Forsetaframbjóðandinn Donald Trump hitti fyrrverandi utanríkisráðherra Bandaríkjanna, Henry Kissinger, í New York í dag.
Bílalest Trump ók að íbúðablokk í Manhattan þar sem fundurinn fór fram.
Kissinger, sem er 92 ára, var maðurinn á bak við utanríkisstefnu Bandaríkjamanna eftir síðari heimsstyrjöldina.
Í viðtali í desember síðastliðnum sagði Kissinger í samtali við Fox Business að Trump ætti ekki að halda þeirri hugmynd sinni til streitu að banna öllum múslimum að koma til Bandaríkjanna. Einnig sagðist hann hafa meira álit á öðrum frambjóðanda repúblikana.
Þrátt fyrir háan aldur hefur Kissinger verið áhrifamikill í samtímastjórnmálum. Hann hefur ekki bara haft áhrif á repúblikana heldur einnig Hillary Clinton, forsetaframbjóðanda demókrata. Hún hefur sagt hann vin sinn og ráðgjafa.
Í síðustu viku hitti Trump James Baker, sem var utanríkisráðherra Bandaríkjanna í stjórnartíð George Bush eldri. Baker hefur einnig gagnrýnt Trump opinberlega fyrir tillögur sínar í utanríkismálum.