Frönsk verkalýðssamtök hafa áform um að trufla almenningssamgöngur og neyðarþjónustu í næsta mánuði, á meðan Evrópukeppnin í knattspyrnu stendur yfir í landinu.
Samtökin, Force Ouvriere, tilkynntu um áform sín á föstudaginn.
Mikið hefur verið um mótmæli og verkfallsaðgerðir víða um Frakkland undanfarna daga en mótmælin eru tilkomin vegna breytinga franskra stjórnvalda á vinnumarkaðslöggjöfinni. Verkalýðssamtök telja þær vanhugsaðar. Þær þrengi að launþegum og skerði réttindi þeirra.
Patrice Clos, sem stýrir samgöngusviði samtakanna, segir að ákveðið hafi verið að boða til verkfalls á leikdögum í þeim borgum þar sem leikið verður.
„Það var ákveðið að í ljósi þess að lögin snerta hagkerfi verkamanna myndum við lama hagkerfi Evrópu þar til lögin verða dregin til baka,” sagði hann.
Í frétt Sky News segir að verkalýðssamtökin séu þekkt fyrir að grípa til harkalegra aðgerða. EM hefst í Frakklandi 10. júní næstkomandi en þegar hefur verið boðað til fjöldamótmæla um allt land 14. júní.
Verkfallsaðgerðirnar gætu haft áhrif á vöruflutninga, almenningssamgöngur, neyðarþjónustu og sorphirðu.
Francois Hollande, forseti Frakklands, hefur sagt að hann muni halda áfram að þrýsta á um óvinsælar breytingar á vinnulöggjöf landsins.
„Ég ætla að halda áfram, af því að ég tel að þessar breytingar séu af hinu góða,“ sagði Hollande við fréttamenn á fundi G7-ríkjanna í Japan. Hann bætti við að frönsk stjórnvöld muni tryggja ferðafrelsi íbúa, en eldsneytisskortur á bensínstöðvum vegna verkfallsaðgerða, sem og verkföll lestarstarfsmanna, hafa haft áhrif á möguleika manna til að komast ferða sinna.