Norðurkóreskum landamæravörðum hefur verið skipað að fanga snáka, sem suðurkóreska leyniþjónustan er sögð hafa sleppt lausum til að klekkja á nágrönnum sínum.
Stjórnvöld í Pyongyang munu hafa sagt hernum norðurkóreska, að leyniþjónusta nágrannanna í suðri bæri ábyrgð á óvenjulegum fjölda snáka í Ryanggang-héraði við nyrðri landamæri Norður-Kóreu, það er að segja þeim er tengja landið við Kína.
The Guardian hefur þetta hefur ónefndum heimildarmanni innan Norður-Kóreu, sem segir skilaboð stjórnvalda vera að suðurkóreska leyniþjónustan noti skriðdýr til að ógna samstöðu Norður-Kóreu. „Fyrr í mánuðinum fengu landamæraverðir það verkefni að fanga snáka áður en þeir skriðu yfir bakka Yalu-ár,“ en árnar Yalu og Tumen aðskilja Kóreuskaga frá Kína.
Eru margir hermenn sagðir ósáttir með fyrirmælin, að sögn heimildarmannsins, og trúa því ekki að Suður-Kórea notist við snáka í baráttunni gegn nágrönnum sínum. Þrátt fyrir efasemdir hefur norðurkóreska öryggisráðuneytið hvatt íbúa til að vera á varðbergi gagnvart snákunum, en orðrómur er uppi um að fólk hafi látist í kjölfar bita í landinu.
Hefur orðrómurinn orðið til þess að smyglarar sem ferðast reglulega yfir til Kína hafa keypt gúmmíbuxur, sem hefur orðið til þess að verð á þeim í landinu hefur snarhækkað upp í 60.000 norðurkóresk won, um 850 íslenskar krónur reiknað í gegnum Bandaríkjadal á óopinberu gengi.