Hryðjuverksamtökin Ríki íslams hafa birt áróðursmyndband þar sem fimm börn, eitt sem er sagt breskt, eru sýnd myrða kúrdíska fanga. Á myndbandinu sjást fimm drengir í herklæðnaði standa fyrir aftan fimm krjúpandi menn í appelsínugulum samfestingum.
Drengirnir halda á byssum.
Myndbandið er textað þannig að sjá má hvaða titil samtökin gefa hverju barni. Bláeygur drengur er þannig merktur „Abu Abdullah al-Britani“ eða „Bretinn“ en ekki hefur tekist að staðfesta að pilturinn sé sannarlega breskur.
Á myndabandinu sést drengur merktur „Abu al-Bara al-Tunisi“ ávarpa mennina, sem virðast kúrdískir bardagamenn, og lofa meira ofbeldi.
Hin börnin eru sögð Abu Ishaq al-Masri, eða „Egyptinn“, Abu Fu'ad al-Kurdi og Yusuf al-Uzbaki.
Ekki er vitað hvar myndbandið var tekið upp.
Í febrúar sl. birti Ríki íslams myndband þar sem ungur breskur drengur, mögulega hinn fjögurra ára Isa Dare, sprengir bíl í loft upp og verður þannig þremur að bana. Isa Dare er sonur öfgamannsins Grace „Khadija“ Dare frá Lewisham í Lundúnum, sem ferðaðist til Sýrlands árið 2012.