Maður sem var handtekinn grunaður um morð á tveimur nunnum í bænum Lexington í Mississippi í Bandaríkjunum hefur játað að hafa banað konunum. Mikil sorg hefur ríkt í bænum undanfarna daga, en konurnar voru þekktar fyrir hjálpsemi sína og örlæti.
Frétt mbl.is: Morð á nunnum vekja óhug
Konurnar hétu Margaret Held og Paula Merrill og voru báðar 68 ára gamlar. Þær bjuggu saman í Lexington og störfuðu á heilsugæslustöð skammt frá heimili sínu. Þegar þær mættu ekki til vinnu á fimmtudag var farið að leita að þeim og þær fundust síðar látnar á heimili sínu.
Lögreglustjóri í bænum segir að maðurinn, sem heitir Rodney Earl Sanders og er 46 ára gamall, hafi játað morðin en ekki gefið upp neina ástæðu fyrir þeim. Ekki er ljóst hvort hann hafi einhver tengsl við konurnar.
Konurnar tvær, sem voru eins og áður sagði nunnur, voru þekktar í bænum, en þær höfðu það að markmiði að bæta heilbrigðisþjónustu fyrir fátæka. Bærinn er sá fátækasti í ríkinu.
Morðin hafa vakið mikinn óhug og fáir geta ímyndað sér hvers vegna einhver myndi vilja myrða konurnar. „Þær gerðu allt fyrir alla,“ sagði Sam Sample, leiðtogi í St. Thomas Catholic Church kirkjunni í Lexington, þar sem konurnar voru sóknarbörn.