Nokkrum yfirfullum bátum með flóttafólki frá Búrma var snúið til baka af landamæravörum í Bangladess í morgun. Um er að ræða Rohingya-fólk sem er að flýja ofbeldið sem það verður fyrir í Búrma þar sem þau eru álitin réttlaus.
Stjórnarandstaðan í Bangladess hefur biðlað til yfirvalda um að fólkinu, sem eru múslímar, verði veitt skjól í landinu en þúsundir flóttamanna leituðu skjóls í Bangladess í síðustu viku. Frásagnir þeirra eru skelfilegar, hópnauðganir, pyntingar og morð af hálfu sérsveita hersins í Búrma.
Átta bátar reyndu að komast yfir Naf ána í morgun en hún skilur að Rakhine-hérað í Vestur-Búrma og suðurhluta Bangladess en fólkið var rekið til baka aftur. Sex bátum var einnig synjað um að koma að landi í Bangladess í gær. 12-15 Rohingyar voru í hverjum bát.
Stjórnvöld í Dhaka segja að þúsundir hafi síðan komið fótgangandi að landamærunum en yfirvöld hafa neitað þeim um að koma til landsins þrátt fyrir ákall alþjóðasamfélagsins. Hvetja stjórnvöld í Bangladess stjórnvöld í Búrma til þess að gera meira til þess að koma í veg fyrir flótta fólks.
Rohingya-fólkið, sem telur um eina milljón manns, er virt sem ólöglegir innflytjendur af mörgum innan hins Búdda-trúaða meirihluta í Búrma. Í Rakhine, þar sem fjölmargir íbúar sem eru Búddatrúar hafa óbeit á Rohinya-múslímum, hefur ofbeldi gagnvart minnihlutahópnum stigmagnast að undanförnu. Sérsveitarmenn eru áberandi í héraðinu og að sögn fulltrúa Sameinuðu þjóðanna eru stundaðar þjóðernishreinsanir á Rohingya-múslímum í héraðinu. Er meðal annars vísað til þess að hermenn hika ekki við skjóta fólk sem reynir að flýja. En ný ríkisstjórn Búrma, sem friðarverðlaunahafi Nóbels Aung San Suu Kyi leiðir, neitar ásökunum.