„Það er verið að taka þetta frekar langt,“ sagði fyrrverandi yfirmaður í lögreglunni í Ósló, Eirik Jensen, en hann er sakaður um spillingu í starfi og aðild að fíkniefnasmygli. Réttarhöld yfir honum standa yfir en þar var hann spurður um tengsl sín við fíkniefnasalann Gjermund Cappelen.
„Ég mun ekki tjá mig frekar um þetta,“ bætti Jensen við. Talið er að hann hafi aðstoðað Cappelen við innflutning á 13,9 tonnum af hassi. Fyrir það hafi hann þegið 2,1 milljón norskra króna, rúmlega 30 milljónir króna, í reiðufé og fleiru.
Fyrrverandi lögreglumaðurinn var ákærður í febrúar í fyrra fyrir að hafa aðstoðað Cappelen við innflutning á hassi. Kom fram að lögreglumaðurinn hefði meðal annars hlotið nýja baðherbergisinnréttingu fyrir aðstoðina.
Jensen, sem er einn helsti sérfræðingur norsku lögreglunnar í málefnum vélhjólagengja, hefur ávallt neitað sök og segist vera með allt uppi á borðinu varðandi samskipti sín við Cappelen sem ná áratugi aftur í tímann.
Jensen átti erfitt með að útskýra hvers vegna hann átti mikið reiðufé, 400.000 norskar krónur. Sagðist þurfa á peningum að halda vegna þess að hann óttaðist um öryggi sitt.