Milo Yiannopoulos, ritstjóri hægri-fréttaveitunnar Breitbart, hefur sagt upp starfi sínu og beðist afsökunar á ummælum sínum. Í myndskeiði sem birtist nýlega virðist Yiannopoulos leggja blessun sína yfir barnagirnd. BBC greinir frá.
„Þetta voru vanhugsuð orð,“ sagði hinn 32 ára Yiannopoulos í yfirlýsingu vegna málsins, en hann sagði jafnframt að myndskeiðið hefði verið klippt til í því skyni að gefa villandi mynd af orðum hans. Hann sagði enn fremur að hann gæti ekki látið þetta óheppilega orðaval hafa áhrif á það mikilvæga starf sem unnið væri hjá fréttaveitunni Breitbart. Hann hefði því ákveðið að segja af sér.
Yiannopoulos segist sjálfur hafa orðið fyrir kynferðislegri misnotkun sem barn og að hann hafi megnustu skömm á fullorðnum sem misnoti börn.
Honum var meinað að halda fyrirlestur á ráðstefnu íhaldsmanna í Bandaríkjunum og þá hefur verið hætt við útgáfu á fyrirhugaðri bók eftir hann.