Erlent | AFP | 15.3.2017 | 15:30

Átökin harðna í Búrma

Baráttukonan Aung San Suu Kyi hefur reynt að blása lífi í friðarviðræðurnar frá því flokkur hennar komst til valda í nóvember árið 2015. AFP

Enn hækkar tala látinna sem hafa fallið í átökum í norðausturhluta Búrma við landamæri Kína en þar hefur ítrekað soðið upp úr á milli hersins og uppreisnarmanna allt frá því nóvember.

Borgin Laukkai í Kongkai-héraði er sögð hafa verið lögð í rúst. Þúsundir íbúa hafa flúið árásir, skothríð og eldhaf yfir landamærin til Kína. Yfir 20 þúsund flóttamenn frá Búrma fóru yfir landamærin til Kína í síðustu viku. Frá því september hafa yfir 50 þúsund íbúar Búrma flúið yfir landamærin, að sögn Sameinuðu þjóðanna.

Tölur um fjölda látinna á reiki

Að minnsta kosti þrír uppreisnarmenn létu lífið í dag og nokkrir liðsmenn stjórnarhersins særðust í átökum í dag. Tölur eru á reiki um hversu mikið mannfallið hefur verið í raun undanfarið. Að minnsta kosti 36 féllu í árás 6. mars á Kokang-svæðinu í Búrma. Þá gerðu uppreisnarhópar áhlaup á herstöð, á meðal þeirra voru borgarar og lögregla. Í tilkynningu frá stjórnarhernum var tala uppreisnarmanna sem létust sögð mun lægri en raun ber vitni, að sögn heimildarmanns AFP.

Óttast er að það sama og gerðist árið 2015 muni endurtaka sig en þá streymdi fólk frá Búrma til Kína með þeim afleiðingum að samband landanna stirðnaði. Í síðustu viku kallaði Kína eftir vopnahléi þegar í stað og vill að til þess verði séð að átökin harðni ekki enn frekar. Koma verður á friði og stöðugleika á landamærum ríkjanna.

Baráttukonan Aung San Suu Kyi hefur reynt að blása lífi í friðarviðræðurnar frá því flokkur hennar komst til valda í nóvember árið 2015. Önnur tilraun til friðarviðræðna sem áttu að eiga sér stað seint í febrúar hefur verið seinkað fram í maí.