Ríkisstjórn Donalds Trumps Bandaríkjaforseta hefur áfrýjað úrskurði dómstóls í Marylandríki, sem hafnað hafði því að ný tilskipun forsetans um ferðabann tæki gildi.
Dómsmálaráðuneytið lét bóka áfrýjun hjá héraðsdómstólnum í Greenbelt í Maryland, tveimur dögum eftir að dómstóllinn, auk annars í Hawaii, úrskurðuðu að bannið mismunaði múslimum.
Málið mun nú fara fyrir alríkisdómstól í Richmond í Virginíu.
Trump hefur sagt að ferðabannið sé nauðsynlegt til að verja öryggi Bandaríkjanna og halda öfgamönnum í burtu. Fyrsta tilraun hans, í janúar síðastliðnum, meinaði ríkisborgurum sjö ríkja, þar sem múslimar eru í meirihluta, um inngöngu í landið.
Dómstóll í Washingtonríki tók bannið úr gildi á þeim grundvelli að það bryti gegn ákvæði stjórnarskrárinnar um mismunun vegna trúar.
Eftir árangurslausa áfrýjun ákvað ríkisstjórnin að lagfæra tilskipunina svo hún væri betur lögum samkvæm. En sú nýja hefur rekist á sömu veggi.
Henni er ætlað að loka landamærum Bandaríkjanna fyrir ríkisborgurum Íran, Líbíu, Sómalíu, Súdan, Sýrlands og Jemen í níutíu daga, og í 120 daga fyrir öllum flóttamönnum. Írak var einnig á listanum í upphaflega banninu en var tekið af honum í því síðara.
Í Hvíta húsinu er því haldið fram að bannið beinist að löndunum sex þar sem öryggis- og upplýsingamál þeirra standist ekki kröfur Bandaríkjanna.
En þó tilskipunin nefni ekki múslima á nafn hafa dómstólar tekið til greina rök þess efnis, að yfirlýsingar Trumps á meðan hann var í framboði til forseta á síðasta ári, um að hann myndi hefja valdatíð sína á því að banna múslimum að koma inn í landið, beri frekar vitni um tilgang ferðabannsins.