Mannréttindadómstóll Evrópu hefur úrskurðað að Great Ormond Street Hospital for Children í Lundúnum megi slökkva á öndunarvél Charlie Gard, sem þjáist af fágætum erfðasjúkdómi sem leiðir m.a. til þess að líffæri hans virka ekki sem skyldi.
Drengurinn fæddist í ágúst í fyrra. Hann er háður öndunarvélinni og hefur dvalið á gjörgæslu frá því í október. Foreldrar hans, Chris Gard og Connie Yates, hafa barist fyrir því að fá Charlie í sína umsjá til að fara með hann í tilraunameðferð í Bandaríkjunum.
Mannréttindadómstóllinn komst hins vegar að sömu niðurstöðu og sjúkrahúsið og breskir dómstólar; að drengsins biði ekkert nema þjáningar og batahorfurnar væru engar. Þá væri meðferðin vestanhafs ekki líkleg til að breyta neinu.
Ítarlega frétt um málið má finna hjá CNN.