Kona í hlutverki Doctor Who

Breska leikkonan Jodie Whittaker verður fyrsta konan til þess að leika hinn fræga Doctor Who í samnefndum sjónvarpsþætti. Fetar hún þar með í fótspor margra þekktra leikara sem hafa túlkað doktorinn fræga.

„Þetta er yfirþyrmandi, sem femínisti, sem kona, sem leikari, sem manneskja, sem einhver sem vill stöðugt ýta við sér og skora á sjálfa sig og ekki vera sett í box sem segir þér hvað þú mátt eða mátt ekki vera,“ sagði hún.

Þættirnir um ævintýri Doctor Who, sem ferðast í rúmi og tíma, hafa notið mikilla vinsælda síðan sýningar hófust árið 1963. Búist er við deilum í kjölfarið á því að þáttarstjórnendur ákváðu að ráða konu í hlutverk doktorsins en Whittaker segir aðdáendum að óttast ekki kyn sitt. „Aðdáendurnir hafa gengið í gegnum margar breytingar og þetta er bara enn ein breytingin; öðruvísi breyting en ekki hræðileg.“

Hin 35 ára gamla leikkona hefur sést víða í sjónvarpi og kvikmyndum og er hvað þekktust fyrir leik sinn í sjónvarpsþáttunum Broadchurch. 

• Blogga um frétt