Lögreglunni í Kristiansand í Suður-Noregi barst tilkynning klukkan 17:33 í dag (15:33 að íslenskum tíma) um að tveir gestir verslunarmiðstöðvarinnar Sørlandssenteret þar í bænum lægju í blóði sínu í matvöruversluninni Coop eftir að stúlka með hníf hljóp öskrandi um verslunarmiðstöðina og réðst á allt sem fyrir varð.
Audun Eide, vettvangsstjóri hjá lögregluumdæmi Agder, staðfestir í samtali við norska dagblaðið VG að lögreglan hafi handtekið táningsstúlku á staðnum og fært hana undir læknishendur eftir handtökuna. Hann staðfestir einnig að hin handtekna hafi komið við sögu lögreglu áður.
Pari með þriggja ára barn, sem var að koma út úr lyftu í verslunarmiðstöðinni, varð ekki um sel við þá sjón sem blasti við þegar lyftudyrnar opnuðust: „Skyndilega kom kona með hníf æðandi á móti okkur, öskrandi og grenjandi,“ lýsti maðurinn, „hún hljóp svo að rúllustiganum og starfsfólk frá Coop kom hlaupandi á eftir,“ sagði hann að auki en fjölskyldan er í fríi í Kristiansand og var nýkomin úr dýragarðinum þegar ósköpin dundu yfir.
Annað vitni, kona sem starfar í miðstöðinni, segir hnífamanneskjuna hafa verið handtekna beint fyrir framan búðina sem vitnið vinnur í. „Við heyrðum fyrst kallað að það vantaði lækni í Coop, svo var öllum á annarri hæð skipað að koma sér niður sem fyrst,“ sagði konan og lýsti því svo að manneskja hafi staðið fyrir utan búðina og sveiflað stórum kjöthníf í kringum sig. „Þetta var ógeðslegt, mig langar ekki að vera í vinnunni,“ sagði hún að endingu.
Um hálftími leið frá atburðunum í Coop þar til stúlkan var handtekin og hafði fjöldi fólks þá hlaupið inn í verslanir og lokað sig þar inn. Tæknideild lögreglu er nú á staðnum þar sem fólkið var stungið en ekki er vitað um ástand þess að svo búnu.