Tvítug bresk fyrirsæta sem var numin á brott á Ítalíu í síðasta mánuði segist hafa verið hrædd um líf sitt „sekúndu fyrir sekúndu, mínútu fyrir mínútu, klukkustund fyrir klukkustund.“ Hún er nú komin til Bretlands í fyrsta sinn eftir hina hræðilegu reynslu. Telegraph greinir frá.
Chloe Ayling var byrluð ólyfjan og hún numin á brott þar sem henni var haldið í viku af Pólverja sem búsettur er í Bretlandi. Reyndi hann að selja hana á uppboði á huldunetinu (dark web), að sögn ítölsku lögreglunnar.
Ayling hafði verið send til Mílanó í júlí til að fara í myndatöku, en þegar þangað kom í ljós að aðeins hafði verið um blekkingu að ræða. Var hún sprautuð með svæfingarlyfinu ketamín í handlegginn skammt frá aðalbrautarstöðinni í Mílanó 11. júlí.
Mannræninginn og aðstoðarmaður hans afklæddu stúlkuna, mynduðu og bundu áður en þeir fluttu hana í farangursrými bifreiðar og óku með hana á sveitabæ í Piedmont-héraði.
Lukasz Pawel Herba, sem er þrítugur, hefur verið ákærður fyrir að skipuleggja mannránið en hann hefur gefið afar ótrúverðugar skýringar á atvikinu að sögn saksóknara.
Rannsóknarlögreglan er ekki fullkomlega viss um hvort Herba hafi verið alvara með því að bjóða fórnarlambið upp á netinu eða hvort hann hafi aðeins verið að hóta þessu til þess að fá greitt lausnarfé. Herba krafði umboðsmann stúlkunnar og fjölskyldu hennar um 300 þúsund evrur í bitcoin-rafmynt.
Í yfirlýsingu sem Ayling gaf við heimili sitt í London í dag lýsti hún reynslunni. „Ég er búin að ganga í gegnum hræðilega lífsreynslu. Ég óttaðist um líf mitt sekúndu fyrir sekúndu, mínútu fyrir mínútu, klukkustund fyrir klukkustund,“ sagði hún.
„Manneskja með svarta hanska kom fyrir aftan mig og setti aðra höndina á hálsinn á mér og hina yfir munninn á mér til að ég gæti ekki öskrað,“ lýsti hún. „Önnur manneskja með lambhúshettu sprautaði mig í hægri handlegginn. Ég held ég hafi misst meðvitund. Þegar ég vaknaði var ég í bleikri samfellu og sokkunum sem ég er í núna.“
Ayling hélt áfram: „Ég áttaði mig á því að ég væri í farangursrými bíls, hendur mínar og fætur væru bundnir og ég væri með límband yfir munninum. Ég var inni í tösku og gat bara andað í gegnum lítið gat.“
Fyrirsætan öskraði svo mikið á leiðinni að ræningjarnir neyddust til að stöðva bifreiðina nokkrum sinnum. Þegar í húsið var komið voru fleiri lambúshettuklæddir menn sem tóku á móti henni. Þá var hún neydd til að sofa á gólfinu í svefnpoka.
„Þeir fylgdust með mér, stöðvuðu mig frá því að flýja og hótuðu að drepa mig ef ég myndi gera það,“ sagði hún. Bætti hún við að hún væri gríðarlega þakklát fyrir þá hjálp sem hún hefði fengið hjá breskum og ítölskum yfirvöldum.
Enginn tók þátt í uppboðinu á netinu og ekki er víst að Herba hafi haft yfir að ráða nauðsynlegum tengiliðum til þess að skipuleggja slíka aðgerð eða hvort aðeins um óra hans hafi verið að ræða að sögn lögreglu.
Ekki hefur enn fengist skýring á því hvers vegna Herba ákvað 17. júlí að fara með ungu konuna aftur til Mílanó og láta hana lausa skammt frá sendiráði Breta í borginni þar sem hann var handtekinn.
Hann sagði við ungu konuna að hann gæti ekki haldið henni lengur þar sem hún ætti ungt barn og glæpasamtökin sem hann sagðist tilheyra bönnuðu slíkt athæfi. Lögreglan segist hins vegar ekki vera viss um að samtökin séu einu sinni sinni til.