Lögreglan í Kaupmannahöfn segir að líkið sem fannst fyrir utan Amager í fyrradag sé af Kim Wall, sænsku blaðakonunni sem hafði verið saknað síðan 10. ágúst. Lífsýni úr líkinu, sem var aflimað, sanni að svo sé. Lögreglan hefur boðað blaðamannafund klukkan níu að staðartíma, klukkan sjö að íslenskum tíma.
Á mánudag greindi lögreglan frá því að Peter Madsen, eigandi og skipstjóri kafbátsins, sem situr í gæsluvarðhaldi vegna andláts Kim Wall, hafi breytt framburði sínum þegar hann kom fyrir dómara en áður hafði hann haldið því fram að hann hefði sett Wall á land í Kaupmannahöfn.
Þar kom fram að Wall hefði látist af slysförum um borð og hann hent henni fyrir borð einhvers staðar í Køge-flóa. Síðdegis á mánudag fann hjólreiðamaður lík í sjónum skammt frá Amager er hann hjólaði meðfram strandlengjunni. Hann lét lögreglu strax vita og þótti þegar líklegast að það væri af Wall. Þar sem líkið var aflimað, það er án höfuðs, fótleggja og handa, var það í höndum réttarmeinafræðinga að staðfesta að svo væri. Þeir hafa nú staðfest að svo sé.
Kim Wall var þrítug að aldri og starfaði í lausamennsku hjá fjölmiðlum víða um heim. Má þar nefna Guardian og New York Times. Hún fór með Madsen, sem er 46 ára, í siglingu með kafbátnum 10. ágúst vegna greinar sem hún var að skrifa um Madsen, sem er frumkvöðull í kafbátasmíði.
Snemma að morgni 11. ágúst lét unnusti hennar vita af því að hún hefði ekki skilað sér heim úr viðtalinu og síðar þann sama dag sökk kafbáturinn en Madsen hafði verið bjargað skömmu áður.
Lögregla telur að Madsen hafi viljandi sökkt kafbátnum en lögregla náði honum á flot. Ekkert fannst við leit í bátnum.
Þegar blaðamaður spurði Madsen um upplýsingar um blaðamanninn horfna sagði Madsen: „Aðeins að hún heitir Kim.
Ég kanna ekki bakgrunn þegar blaðamaður hringir og biður um viðtal,“ svaraði Madsen tómlega þegar hann var leiddur inn í lögreglubíl eftir björgunina 11. ágúst.
Politiken fjallar um ævi og störf Kim Wall á vef sínum í dag. Þar kemur fram að hún hafi lokið meistaranámi í blaðamennsku frá Columbia-háskólanum í New York árið 2013. Síðan þá hafi hún starfað víða um heim, svo sem í Asíu, Afríku, Bandaríkjunum og á Kyrrahafinu. Að sögn fjölskyldu hennar bjó hún í Peking og New York jöfnum höndum.
Að sögn fjölskyldunnar var Wall einbeitt og metnaðargjörn í starfi. Umfjöllunarefni hennar snerust oft um félagsleg málefni, utanríkismál, poppmenningu og málefni kynjanna.
Þrátt fyrir ungan aldur höfðu greinar hennar ratað í fjölmiðla víða - bæði tímarit og dagblöð.
Hún hafði ferðast um heiminn þveran og endilangan og skrifað frá Norður-Kóreu, Kína og Srí Lanka þar sem hún fjallaði meðal annars um femínisma í blóðugu stríði og frá Haítí þar sem hún dvaldi eftir jarðskjálftann mikla.
Umfjöllun hennar um loftslagsmál og kjarnorkuvopnatilraunir á Marshalleyjum hlaut í fyrra Hansel Mieth-verðlaunin fyrir umfjöllun í stafrænum miðli.