Öflugur stormur gekk á land á suðurströnd Kína í nótt og olli miklum usla í sjálfstjórnarhéruðunum Hong Kong og Makaó. Stormurinn reif upp tré og lamaði atvinnulíf í fjármálamiðstöðinni Hong Kong, auk þess sem flóð urðu á götum við sjávarsíðuna.
Að minnsta kosti 34 meiddust í Hong Kong og fregnir frá yfirvöldum í Makaó herma að þrír hafi látist í fárviðrinu, að því er fréttastofa Reuters greinir frá.
Stormurinn, sem kallaður er Hato, er sá öflugasti sem herjað hefur á borgina frá því árið 2012. Mesti vindhraði sem mældist er stormurinn gekk á land var 155 km/klst., eða um 43 metrar á sekúndu.
Fella þurfti niður 450 flug frá Hong Kong og öllum skólum var lokað. Tómlegt var um að litast í fjármálahverfinu, þar sem starfsemi lá niðri og skrifstofufólk hélt sig heima.
„Bílar eru í hálfu kafi vegna flóða og risastór tré hafa fallið til jarðar. Ég hef aldrei séð svona storm,“ segir Garret Quigley, íbúi í vesturhluta Hong Kong, í samtali við Reuters.
Stormurinn olli tveggja tíma rafmagnsleysi í Makaó, auk þess sem truflanir urðu á síma- og netsambandi. Þar voru mikil flóð á götum og sjór flæddi í drykkjarvatnsból á nokkrum svæðum í borginni. Aðalatvinnugreinin í Makaó er fjárhættuspil og helstu spilavítin þar í borg sluppu við rafmagnsleysið þar sem þau voru búin öflugum vararafstöðvum.
Fleiri svæði urðu fyrir barðinu á Hato. Í Guangdong-héraði var fjölda áætlunarfluga aflýst frá Shenzhen-alþjóðaflugvellinum og almenningssamgöngur lágu niðri. Þúsundir íbúa við suðurströnd Kína voru fluttir inn í land og fiskveiðiflotinn kallaður í land.