Meta næstu skref á fundinum
Setja bókamerki
Öryggisráð Sameinuðu þjóðanna kemur nú saman til aukafundar í New York í kjölfar þess að stjórnvöld í Norður-Kóreu skutu eldflaug yfir Japan í gær. Fulltrúar nokkurra ríkja sögðu fyrir upphaf fundarins að til stæði að meta næstu skref á fundinum.
Koro Bessho, sendiherra Japana hjá Sameinuðu þjóðunum, sagði fyrir fundinn að stjórnvöld í Japan þyrftu að setja meiri þrýsting á Norður-Kóreu, en það væri meðal þess sem rætt yrði á fundinum.
Þá sagði Nikki Haley, sendiherra Bandaríkjanna hjá Sameinuðu þjóðunum, að „eitthvað alvarlegt þyrfti að gerast“. „Þetta er óásættanlegt. Þeir hafa brotið sérhverja ályktun Öryggisráðsins sem við höfum samþykkt, þannig að ég tel að eitthvað alvarlegt þurfi að gerast núna,“ sagði Haley í dag.
Þá sagði Matthew Rycroft, sendiherra Breta hjá Sameinuðu þjóðunum, að ráðið þyrfti að íhuga hertar refsiaðgerðir gegn Norður-Kóreu.
Áður hafði Donald Trump Bandaríkjaforseti varað við því að „allir valkostir“ væru uppi á borðum. Ummæli forsetans þykja gefa til kynna að yfirvöld vestanhafs hafi ekki útilokað að grípa til hernaðaraðgerða.
Í yfirlýsingu sem varnarmálaráðuneyti Bandaríkjanna sendi frá sér í dag segir að flugskeytið hafi verið meðaldrægt. Það hafi ekki ógnað Bandaríkjunum og hafi ekki afl til að ná til eyjarinnar Guam í Kyrrahafinu.
Nýjasta útspil Norður-Kóreumanna hefur verið gagnrýnt út um allan heim en Shinzo Abe, forsætisráðherra Japan, sagði um að ræða fordæmalausa og alvarlega ógnun.
Eldflaugaskotið er til marks um enn frekari stigmögnun deilnanna milli Norður-Kóreu og alþjóðasamfélagsins um kjarnorkuáætlun fyrrnefnda. Norðurkóresk stjórnvöld hafa réttlætt tilraunaskotið sem ákveðið viðbragð við „ögrun“ af hálfu Bandaríkjamanna, sem hafa ítrekað kallað eftir því að aðilar setjist aftur að samningaborðinu.
Sáttur við sína stöðu og finnur fyrir meðbyr
Fiskikóngurinn: „Mér fannst sárt að heyra það“
„Mér finnst Halla Hrund svona Vigdísarleg“
Katrín: Jóhönnustjórnin talaði máli Íslands
Fara ekki lengur fram á einangrun yfir Davíð
Bifreið ekið á skrifstofu Útlendingastofnunar
Áköf mótmæli í bandarískum háskólum