McCain kemur Obamacare aftur til bjargar

John McCain, öldungadeildarþingmaður repúblikana, glímir við krabbamein í heila.
John McCain, öldungadeildarþingmaður repúblikana, glímir við krabbamein í heila. AFP

John McCain, öldungadeildarþingmaður Repúblikanaflokksins, segist ekki geta stutt nýjustu tilraunir flokksystkina sinna í Repúblikanaflokknum til að afnema Obamacare.

McCain glímir við krabbamein í heila og segist „ekki geta með góðri samvisku“ kosið með nýju heilbrigðisfrumvarpi sem Donald Trump Bandaríkjaforseti vill að leysi Obamacare af hólmi. Þetta er þar með í annað sinn sem McCain kemur Obamacare til bjargar.

Segir McCain það vera rangt að samþykkja svo afdrifaríka löggjöf án aðkomu demókrata. Þetta er í annað sinn sem hann stöðvar framgöngu málsins í óþökk stuðningsmanna nýs frumvarps innan Repúblikanaflokksins.

Hvert atkvæði þingmanna repúblikana skiptir miklu máli en demókratar hafa sameinast í andstöðu sinni við áform forsetans og standa vörð um Obamacare. Andstaða McCain gæti gert út af við áralanga atlögu íhaldsmanna að heilbrigðislöggjöfinni sem kennd er við Barack Obama, fyrrverandi Bandaríkjaforseta, sem samþykkti löggjöfina í forsetatíð sinni.

Þá hefur Rand Paul, sem einnig er öldungadeildarþingmaður Repúblikanaflokksins, lagst gegn nýju heilbrigðisfrumvarpi auk þess sem nokkrir þingmanna flokksins til viðbótar hafa ekki tekið afgerandi afstöðu með eða á móti frumvarpinu.

Frétt BBC.

mbl.is
Fleira áhugavert
Fleira áhugavert