Veruleg hætta fylgir flóðum sem komu eftir að stífla brast á Púertó Ríkó nú í kvöld í kjölfar þess að fellibylurinn María fór yfir eyjuna í gær. Segir BBC flóðahættuna við ána Guajataca vera verulega og er nú unnið að því að flytja fólk á brott frá svæðinu eins hratt og unnt er.
María hefur kostað 13 manns hið minnsta lífið á Púertó Ríkó, en fellibylurinn olli mikilli eyðileggingu á eyjunni og eru þær 3,5 milljónir sem þar búa enn án rafmagns. Talið er að það muni taka mánuði áður en rafmagn verður komið á að fullu aftur.
Ricardo Rossello, ríkisstjóri Púertó Ríkó, segir fellibylinn vera þann versta í heila öld. Starfsmenn Guajataca-stíflunnar sem er í norðvesturhluta Púertó Ríkó segja hana hafa gefið sig um tvöleytið að staðartíma, eða sjöunda tímanum í kvöld samkvæmt íslenskum tíma.
Samstundis var gefin út viðvörun við skyndiflóðum í nágrannahéruðunum og eru íbúar hvattir til að koma sér upp í næstu hlíðar.
„Þetta eru einstaklega hættulegar, lífshættulegar aðstæður. Reynið ekki að ferðast nema þið séuð að flýja svæði sem þar sem hætta er á flóðum eða sem fólki hefur verið skipað að yfirgefa,“ sagði í viðvörun veðurstofu Púertó Ríkó.
María er nú þriðja stigs fellibylur og er á leið frá eyjunum Turks & Caicos og er talið að hún fari austur fyrir Bahama-eyjar um helgina.
Vitað er til að María hafi til þessa kostað 30 manns lífið, þar af 15 manns á eyjunni Dóminíku, en 20 manns til viðbótar er enn saknað þar, að sögn forsætisráðherrans Roosevelt Skerrit. „Þetta hefur verið hræðilegt,“ sagði hann. „Ég hef aldrei séð aðra eins eyðileggingu.“