Birgitta Jónsdóttir, þingmaður Pírata, er í hópi þeirra mótmælenda sem safnast hafa saman fyrir utan kjörstaði í Barcelona og deilir færslu um málið á Twitter.
Spænska lögreglan hefur nú í morgun lagt hald á kjörkassa í Barcelona að því er spænska innanríkisráðuneytið greindi frá á Twitter og birti mynd af kjörkössum.
I am at a polling station in Barcelona #catalanreferendum https://t.co/VFxnTl0bLX
— BirgittⒶ Jónsdóttir (@birgittaj) October 1, 2017
Hópar fólks hafa safnast saman fyrir utan kjörstaði víða í Katalóníu en sjálfstæðissinnar í héraðinu standa fyrir kosningum í dag um sjálfstæði Katalóníu. Spænska óeirðalögreglan hefur lokað af kjörstað í bænum Girona þar sem leiðtogi aðskilnaðarsinna átti að kjósa og að sögn AFP-fréttastofunnar kom til einhverra átaka er lögregla kom á staðinn.
Stjórnlagadómstóll Spánar hefur dæmt kosninguna ólöglega og stjórnvöld í Madrid hafa heitið því að koma í veg fyrir kosninguna.
Spænska stjórnin sendi þúsundir lögreglumanna til Barcelona til að koma í veg fyrir atkvæðagreiðsluna og í gær lokaði lögreglan 1.300 af 2.315 skólum í Katalóníu á Spáni sem nota átti sem kjörstaði.