Höfuð, fótleggir og fatnaður blaðakonunnar Kim Wall fannst í plastpoka í Køge-flóa í gær, föstudag. Pokarnir voru þyngdir með járnhlutum. Engir áverkar voru sýnilegir á höfði Wall. Það passar ekki við sögu Peter Madsen, sem hefur verið í haldi lögreglunnar frá því ágúst, sem segist hafa hent líki hennar frá borði eftir að járnhleri hafi fallið á höfuð hennar.
Sundurlimaður búkur Wall fannst í ágúst, tæpum tveimur vikum eftir hvarf hennar, einnig í Køge-flóa. Fjölmargir áverkar fundust á kynfærum hennar, samkvæmt réttarmeinarannsókn á líki hennar. Þetta kom fram á blaðamannafundi dönsku lögreglunnar sem fram fór í morgun.
„Í gærmorgun fundum við plastpoka með fatnaði Kim Wall, nærfötum, sokkabuxum og skóm. Í sama poka fannst hnífur og járnrör til að sökkva pokanum,“ sagði Jens Møller Jensen sem stýrir rannsókninni.
„Um kvöldmatarleytið fundum við fótlegg og svo annan. Skömmu síðar fundum við höfuðið einnig í plastpoka sem hafði verið þyngdur með ótal málmhlutum,“ sagði Jensen.
Engin ummerki eru á höfuðkúpunni sem benda til ofbeldis, að sögn Jensen. Ekki er hægt að skera úr um dánarorsök Wall með vissu þar sem lokarannsókn á líki Wall hefur ekki farið fram. Fram að þessu hefur meginþungi rannsóknarinnar beinst að því að finna höfuð Wall.
Réttarmeinafræðingar voru að störfum í nótt og staðfestu að höfuðið væri af blaðakonunni.
Madsen hefur alfarið neitað að hafa átt við lík hennar að öðru leyti en að varpa því í sjóinn eftir að Wall hlaut höfuðhögg. Lögreglurannsóknin hefur sýnt að erfðaefni Walls hefði fundist undir nöglum Madsens. Myndbönd hafa fundist á tölvu hans með ofbeldisefni. Þar á meðal morð og limlestingar á konum þar sem þær eru pyntaðar og kveikt í þeim. Madsen hefur haldið því fram að hann eigi ekki tölvuna og að fleiri hefðu notað hana. Myndböndin væru því ekki endilega hans.