Donald Trump Bandaríkjaforseti sagði á Twitter að árásarmaðurinn, sem drap átta manns og særði 11 alvarlega þegar hann ók yfir hjólreiðafólk og gangandi vegfarendur á Manhattan í New York í gær, hafi verið „mjög veikur og ruglaður einstaklingur“.
Árásarmaðurinn, Sayfullo Saipov, 29 ára, var innflytjandi frá Úsbekistan sem var búsettur í Flórída. Hann var særður af lögreglu á vettvangi og handtekinn á staðnum.
„Við megum ekki leyfa Íslamska ríkinu að snúa aftur, eða komast í landið okkar, eftir að við höfum sigrað þá í Mið-Austurlöndum og annars staðar. Nú er komið nóg!“ skrifaði Trump enn fremur á Twitter.
Trump bætti því við að hann vildi að bakgrunnur innflytjenda yrði kannaður frekar, án þess að útskýra mál sitt nánar.
Andrew Cuomo, ríkisstjóri New York, sagði í samtali við CBS-fréttastofuna að miði hefði fundist í bíl árásarmannsins sem tengdi hann við hryðjuverkasamtökin Ríki íslams. Greint hefur verið frá því að Saipov hafi kallað Allahu akbar – Guð er mikill.
Bill de Blasio, borgarstjóri New York, sagði að atvikið væri heigulsleg hryðjuverkaárás sem beindist að saklausu fólki.
„Við vitum að árásir eru gerðar til að reyna að brjóta okkur niður. Við vitum hins vegar að íbúar New York eru sterkir og andinn í borginni verður aldrei brotinn niður með ofbeldi eða einhverju sem á að ógna okkur,“ sagði de Blasio.