„Ég þekkti varla móður mína“

Ein kvennanna sem lést í gær var jörðuð í dag.
Ein kvennanna sem lést í gær var jörðuð í dag. AFP

Syrgjandi ættingjar báru í morgun kennsl á lemstruð lík þeirra sem tróðust undir og fórust í troðningi á markaðstorgi í bænum Sidi Boulaalam í Marokkó í gær. 15 konur létust í troðningnum.

„Ég þekkti varla móður mína,“ sagði Mjid en móðir hans var ein þeirra sem tróðst undir.

Nokkur hundruð konur höfðu komið á markaðstorgið í gær þar sem árleg úthlutun matargjafa átti að fara fram. Vitni sagði í samtali við AFP-fréttastofuna að fólk hefði ýtt, hrint hvert öðru og hent niður girðingum þar sem það barðist um matinn.

„Ef þú fellur til jarðar þá er þessu lokið og þú verður troðin undir,“ sagði kona sem var flutt særð á spítala. Yfirvöld heita því að málið verði rannsakað.

mbl.is
Fleira áhugavert
Fleira áhugavert