„Leyfðu mér að snerta brjóstin þín“

Carlo Tavecchio, sem á mánudag lét af störfum sem forseti ítalska knattspyrnusambandsins, hefur verið sakaður um kynferðislegt áreitni.

Konan sem sakar Tavecchio um áreitni er kölluð Mary í ítalska blaðinu Corriere della Sera. Í viðtali við blaðið ræðir hún fund sinn og Tavecchio.

„Ég fór inn á skrifstofu hans til að ræða um fótbolta. Hann gaf mér varla tíma til að heilsa heldur horfði á mig og sagði: „Þú lítur vel út, ég sé að þú stundar reglulega kynlíf.“,“ sagði Mary.

„Hann bað mig síðan að koma nær sér: „Leyfðu mér að snerta brjóstin þín.“,“ sagði Mary að Tavecchio hefði sagt við hana.

„Mér fannst þetta óþægilegt og reyndi að segja honum að hætta. Hans svar við því var að draga fyrir gardínurnar að skrifstofunni,“ sagði Mary.

Hún segist hafa orðið fyrir áreitni um langan tíma meðan hún starfaði innan knattspyrnusambandsins. Hún ákvað að segja sögu sína þegar í ljós kom að Tavacchio hefði í hyggju að starfa áfram innan knattspyrnuhreyfingarinnar þrátt fyrir að hann væri hættur sem forseti knattspyrnusambandsins.

• Blogga um frétt