Carles Puigdemont, fyrrverandi forseti heimastjórnar Katalóníu og leiðtogi sjálfstæðissinna, krefst þess að fá áheyrn hjá Evrópusambandinu eftir að þrír flokkar sjálfstæðissinna fengu nauman meirihluta í kosningum til héraðsþings sem fóru fram í gær. Flokkarnir fengu 70 þingsæti af 135. AFP-fréttastofan greinir frá.
„Ég krefst þess að framkvæmdastjórn ESB eða aðrar stofnanir sambandsins hlusti, hlusti að minnsta kosti á fólkið í Katalóníu, ekki bara spænsk yfirvöld,“ sagði Puigdemont við blaðamann í Brussel í Belgíu fyrr í dag. Framkvæmastjórn ESB hefur hingað til stutt Mariano Rajoy, forsætisráðherra Spánar í Sjálfstæðisdeilunni „Þeir hafa rétt til að taka stöðu með spænskum yfirvöldum en ég tel mikilvægt að hlusta á alla aðila í þessari deilu. Ég tel að íbúar Katalóníu eigi rétt á því að fá áheyrn hjá framkvæmdastjórninni.“
Puigdemont hefur dvalið í Belgíu frá því í október en hann flúði þangað ásamt fleiri fyrrverandi ráðherrum heimastjórnarinnar eftir að hafa einhliða lýst yfir sjálfstæði Katalóníu í andstöðu við spænsk stjórnvöld.
Hann hefur sagt að niðurstöður kosninganna í gær séu sigur fyrir „lýðveldið Katalóníu“ og að spænska ríkið hafi tapað. Nú vill hann fá að koma sínum málstað á framfæri.