Þegar neyðin er stærst er hjálpin næst

Slökkviliðsmenn hjá Slökkviliði höfuðborgarsvæðisins eru ávallt vandanum vaxnir sama hvert útkallið er. Það átti við í dag þegar áhyggjufullir íbúar í Ásvallagötu höfðu samband og létu vita af kettlingi sem sat fastur uppi í tré í um 6 - 7 metra hæð.

Slökkviliðsmenn mættu galvaskir á staðinn með stiga og náðu í kettlinginn, en tilkynningin barst um kl. 16:30. „Fólk vorkennir svona greyjum sem eru hangandi uppi í tré og þá reynum við að koma þeim niður,“ sagði varðstjóri í samtali við mbl.is.

Hann segir að ekki sé vitað hver eigi köttinn. „Við slepptum honum og þá hljóp hann fyrir húshornið og ætli hann sé ekki kominn heim,“ sagði varðstjóri.

• 1 blogg um fréttina

Bloggað um fréttina

• Jakob Falur Kristinsson: Afrek