Eftir Guðmund Sverri Þór sverrirth@mbl.is

Verkfræðistofan Línuhönnun og Vegagerðin hafa sent Skipulagsstofnun tillögu að matsáætlun fyrir umhverfismat breikkunar Suðurlandsvegar, á kaflanum frá Hólmsá til Hveragerðis. Tillagan liggur frammi til kynningar hjá Skipulagsstofnun og er öllum frjálst að skoða hana og gera við hana athugasemdir en þeim ber að skila eigi síðar en 30. maí nk.

Þar sem hér er um tillögu að matsáætlun að ræða liggur mat á umhverfisáhrifum ekki fyrir en í tillögunni má sjá þá kosti sem metnir verða miðað við þá framkvæmdaáætlun sem fyrir liggur.

Í matsáætlun kemur fram að þrjár tillögur hafi verið til skoðunar hvað varðar mislæg vegamót við Bolaöldu og Litlu kaffistofuna en þær gera allar ráð fyrir einum vegamótum á þessum stað. Í tveimur þeirra er gert ráð fyrir að færa þurfi Litlu kaffistofuna en sú þriðja gerir ekki ráð fyrir slíkri færslu.

Fram kemur í tillögu Línuhönnunar að fjórir þættir framkvæmdarinnar muni valda umhverfisáhrifum. Í fyrsta lagi er þar um að ræða jarðrask af völdum sjálfrar vegagerðarinnar en þar ber einnig að nefna að vegfyllingar hafa áhrif á lífríki auk sjónrænna áhrifa nýs vegar og mislægra vegamóta. Í öðru lagi hefur umferð á framkvæmdatíma áhrif á umhverfi og í þriðja lagi mun umferð á rekstrartíma framkvæmdarinnar hafa áhrif á umhverfið. Síðast en ekki síst ber að nefna að efni þarf í fyllingar, burðarlög og slitlag og meta þarf áhrif af efnistöku og frágangi.