Fararskjótinn Lucinda var kvaddur með söknuði í Ulan Bator í Mongólíu í gær. mbl.is

„Við kláruðum í gær og komumst til Ulan Bator á 18 dögum," segir Arnar Freyr Vilmundarson en hann og Cristopher Friel, skoskur félagi hans, náðu öðru sæti í kappakstri frá London til Ulan Bator í Mongólíu. „Við erum mjög sáttir og þetta gekk allt vel," segir Arnar.  Markmið kappakstursins var að ná til Ulan Bator á a.m.k 24 dögum og safna fé til góðgerðarmála í landinu.

Ökutæki þeirra var Suzuki Samurai-bifreið frá árinu 1988 sem býr yfir 980 cc vél en skilyrði var að aka á bíldruslu.   „Það fór ekkert stórvægilegt úrskeiðis með bílinn, hann náði alla leið með sóma, en ég held hann hefði ekki þolað mikið meira," segir Arnar.  Þeir kvöddu svo bílinn með söknuði í gær en hann verður seldur á uppboði og ágóðinn rennur til góðgerðarmála.

Arnar segir Mongóla hafa verið mjög vinalega og alltaf tilbúna til þess að aðstoða þá ef þeir spurðu til vegar.  „Mongólía var dásamleg, þetta var eins og villta vestrið, engir vegir, og engin skilti," segir Arnar og bætir við að á fyrstu tveim dögunum í Mongólíu hafi þeir oft villst.   „Við vorum með kompás og kort, en notuðum ekkert GPS tæki eða gervihnattasíma."

Auk ævintýranna við aksturinn segir Arnar að ein upplifun hafi staðið sérstaklega upp úr.  Síðastliðinn föstudag keyrðu Arnar og Christopher meðfram vatni í miðri mongólskri eyðimörk og allt í einu dimmir mjög snögglega. 

„Þetta var stórkostlegt, það var sólmyrkvi, við vorum á besta stað í heimi til þess að sjá þetta,"segir Arnar en margir ferðamenn fóru sérstaklega til Mongólíu í síðustu viku einungis til þess að sjá myrkvann.  

 Að sögn Arnars tekur nú við hvíld í nokkra daga áður en hann snýr heim.