Lögreglustjórinn á höfuðborgarsvæðinu hefur ákært 23 ára mann fyrir alls 16 umferðarlagabrot sem hann framdi á tæplega tveggja ára tímabili. Samkvæmt ákærunni eru brotin af margvíslegum toga, flest fyrir hraðakstur.

Fyrsta brotið framdi maðurinn 30. júlí 2006 þegar hann ók bifreið án skrásetningarmerkja að framan, án þess að hafa ljósin tendruð, á 114 km hraða í Ártúnsbrekkunni, þar sem hámarkshraði er 80 km. Að auki var hann ekki með ökuskírteini meðferðis við aksturinn.

Síðan eru brotin talin upp í ákærunni hvert af öðru. Flest eru þau fyrir hraðakstur eins og fyrr segir, eða 8 talsins. Hraðast ók hann á 130 km hraða þegar hann var gripinn. Það var 26. apríl sl., þegar lögregla stöðvaði hann á Suðurlandsvegi við Kögunarhól, en hámarkshraði á þessum vegakafla er 90 km.

Tvöfaldur ölvunarakstur

Einu sinni var maðurinn stöðvaður fyrir ölvunarakstur og í annað skipti fyrir að aka ölvaður og undir áhrifum fíkniefna. Í einu tilviki er maðurinn ákærður fyrir að aka bifreið sem var ótryggð og í öðru tilviki fyrir að aka vörubifreið án þess að hafa tilskilin réttindi.

Athygli vekur að í þessum 16 tilvikum ók maðurinn 10 mismunandi bifreiðum.

Loks er maðurinn ákærður fyrir vopnalagabrot

Þar sem ekki tókst að birta manninum ákæruna er honum birt fyrirkall í Lögbirtingablaðinu. Á maðurinn að koma fyrir Héraðsdóm Reykjavíkur miðvikudaginn 3. september nk.