Einar Skúlason mbl/ÞÖK

Bæði Alþjóðahúsið og ræðismaður Pólverja á Íslandi hafa fengið fjölda fyrirspurna vegna þess að innflytjendur sem hér vinna geta ekki lengur flutt launin sín til heimalands síns. Samkvæmt heimildum mbl.is hafa bæði bankarnir og Western Union neitað að flytja peninga á reikninga erlendis í dag eftir að hafa verið með hámark erlendra millifærslna í gildi í gær.

„Síðustu daga hafa bankarnir verið með hámark á millibankafærslur sem nam um 200 þúsundum íslenskra króna, en núna virðist alfarið vera búið að loka á öll gjaldeyrisviðskipti,“ segir Einar Skúlason, framkvæmdastjóri Alþjóðahússins. 

Að sögn Einars hefur fulltrúum Alþjóðahússins reynst erfitt að fá þetta staðfest hjá viðskiptabönkunum, Seðlabankanum og viðskiptaráðuneytinu. „Bankarnir hafa ekki tilkynnt um þetta formlega, hins vegar höfum við fengið fregnir af því að fólk hafi ekki fengið þessa þjónustu í bönkunum,“ segir Einar og tekur fram að snúið geti reynst að útskýra fyrir skjólstæðingum Alþjóðahússins hvers vegna þeir geti ekki millifært laun sín heim. Margir þeirra sem leiti til Alþjóðahússins  séu að framfleyta fjölskyldunni sinni í heimalandinu og hafi eðlilega áhyggjur af ástandinu.   

„Við biðjum fólk að bíða átekta og sýna þolinmæði, af því að verið sé að vinna í því að leysa málin. Við bendum fólki líka á að allir séu á sama báti. Það er enginn sem fær einhverja sérstaka fyrirgreiðslu umfram aðra. Þetta snýst ekki um þjóðerni eða ríkisborgararétt. Það er það eina sem við getum sagt á þessum tímapunkti,“ segir Einar og tekur fram að um leið og einhverjar fréttir berist um stöðu efnahagsmála séu þær settar inn á vef Alþjóðahússins á hinum ýmsu tungumálum.