Stefnt er að opnun bókabúðar Máls og menningar í húsnæðinu að Laugavegi 18 á Menningarnótt. Nú er orðið ljóst að verslunin verður annars vegar í eigu Bókmenntafélags Máls og menningar og hins vegar í eigu Kaupangurs ehf. sem á húsnæðið, og mun hvort félag eiga helmingshlut. Upphaflega stóð til að Iða kæmi að rekstrinum, en að sögn Árna Einarssonar, stjórnarformanns Máls og menningar, var fallið frá því. „Þessi varð niðurstaðan og í sjálfu sér er ekkert meira um það að segja,“ segir Árni.

Þá er orðið ljóst að kaffihúsið Súfistinn verður opnað að nýju í bókabúðinni. „Við erum ákaflega ánægð með að Birgir sem á Súfistann óskaði eftir því að koma aftur, og við gátum ekki hugsað okkur betri samstarfsaðila, enda unnum við með honum í tíu ár. Við höfðum ekki áhuga á að fá keðjukaffihús, ekki frekar en að við höfum áhuga á því að reka keðjubókabúð,“ segir Árni.