Hreppsnefnd Hrunamannahrepps samþykkti í gærkvöldi ályktun þar sem lýst er undrun á þeirri ákvörðun umhverfisráðherra að neita að staðfesta tilllögu um breytingu á aðalskipulagi Flóahrepps og Skeiða- og Gnúpverjahrepps sem snýr að virkjunum í neðri Þjórsá.

Sveitarstjórn Flóahrepps samþykkti einnig ályktun á fundi í gærkvöldi þar sem lýst er undrun  á synjun umhverfisráðherra á staðfestingu aðalskipulagsins. Segist sveitarstjórnin  telja að rétt hafi verið staðið að gerð og samþykkt  skipulagsins og að í ljósi þeirra röksemda sem ráðherra byggi synjun sína á vakni spurningar um hvort öll sveitarfélög á landinu sitji við sama borð þegar kemur að skipulagsmálum.

„Lengi hefur tíðkast að sveitarfélög víða um land hafi haft þann háttinn á að láta aðila sem óska eftir breytingum á deiliskipulagi og aðalskipulagi bera hluta af kostnaði sem hlýst af skipulagsvinnunni. Hefur þetta fram til þessa verið talið heimilt og ekki verið gerðar athugasemdir af hálfu ráðherra. Þá gerir sveitarstjórn alvarlegar athugasemdir við málsmeðferð ráðherra. Bæði tók málið mjög langan tíma hjá ráðherra auk þess sem sveitarstjórn var ekki kynnt bréf og gögn frá aðilum, sem vísað er til í ákvörðun ráðherra en þetta eru bréf og gögn sem bárust ráðuneytinu eftir að lögformlegum athugasemdafresti var lokið," segir í bókun sveitarstjórnarinnar.

Var sveitarstjóra og oddvita falið að skoða nánar í samráði við lögmann sveitarfélagsins þær leiðir sem færar séu í ljósi þeirrar stöðu sem upp er komin í málinu í kjölfar synjunar ráðherra á staðfestingu aðalskipulagsins.

Í viðtengingarhætti

Umhverfisráðuneytið sendi í morgun frá sér leiðréttingu vegna frétta af bókun sveitarstjórnar Skeiða- og Gnúpverjahrepps, þar sem meintum ærumeiðingum umhverfisráðherra í ákvörðun um breytingu á aðalskipulagi hreppsins er mótmælt. 

„Bókun sveitarstjórnarinnar byggir að mati ráðuneytisins á misskilningi á einni efnisgrein í bréfi umhverfisráðherra. Má ef til vill rekja misskilninginn til þess að sveitarstjórnarmönnum hafi yfirsést að síðasta sögn efnisgreinarinnar er í viðtengingarhætti.

Sú efnisgrein í bréfi ráðherra sem sveitarstjórnin vísar til er svohljóðandi:

„Í framkomnum gögnum hafa komið fram upplýsingar um að sveitarstjórnarmenn hafi persónulega þegið aukagreiðslur frá Landsvirkjun vegna funda í sambandi við skipulagsgerðina sem ekki hafi verið færðar til bókar og að þær greiðslur hafi verið inntar af hendi í lok árs 2009. Að mati ráðuneytisins verður að telja slíka tilhögun ólögmæta við skipulagsgerð sveitarstjórnar eigi hún sér stað."

Þarna vísar ráðuneytið til þess að í gögnum hafi komið fram það sama og var áberandi í umræðu um málið á sínum tíma - að einstaklingar hafi þegið greiðslur frá framkvæmdaraðila. Ráðuneytið leggur ekki mat á þær upplýsingar, enda eru þær ekki lagðar til grundvallar ákvörðun ráðuneytisins í málinu. Hins vegar er talin ástæða til að nefna þetta og undirstrika þann lagaskilning að slíkar greiðslur stangist á við lög ef þær eiga sér stað. Ekki er kveðið upp úr með að þær hafi átt sér stað í þessu tilviki - þótt sveitarstjórnin hafi túlkað texta ráðuneytisins svo," segir í tilkynningu ráðuneytisins.