Frá Osló en þar hafa þúsundir Íslendinga farið til náms á síðustu áratugum. Golli / Kjartan Þorbjörnsson

Íslenskir námsmenn munu í haust missa aðstöðu sína í Ósló, Guðrúnarstofu, sem þeir hafa haft til afnota allt frá árinu 1960. Talsmenn Félags íslenskra námsmanna í Osló og nágrenni (FÍSN) segja þetta hafa djúpstæð áhrif á starfsemi félagsins.

FÍSN var stofnað árið 1951. Haustið 1960 afhenti stjórn Félagsstofnunar stúdenta í Osló (SiO) félaginu dagsstofu í blokk á nemendagörðunum að Sogni í norðurhluta Oslóar án endurgjalds, til heiðurs íslenskri konu. Konan hét Guðrún Brunborg og hafði unnið mikið hugsjónastarf í þágu íslenskra námsmanna og bættra samskipta Íslands og Noregs á árunum eftir seinni heimsstyrjöld, segir í tilkynningu frá FÍSN.

„Þessi stofa hefur alla tíð borið nafnið Guðrúnarstofa. Á síðustu 50 árum hefur tíðarandinn breyst og eins starfsemin innan SiO. Nú er svo komið að SiO hyggst leggja Guðrúnarstofu niður á komandi hausti og reisa viðbyggingu þar sem Guðrúnarstofa er nú. Vegna reglna sem SiO starfar eftir verður ekki hægt að bæta FÍSN skaðann af þessu og verður FÍSN því ekki boðin ný húsakynni í staðinn.

Guðrúnarstofu þekkja án efa langflestir sem sótt hafa nám til Oslóar síðustu 50 árin. Guðrúnarstofa hefur verið fastur punktur í tilveru íslenskra stúdenta og þaðan eiga margir góðar minningar. Að missa Guðrúnarstofu hefur vægast sagt djúpstæð áhrif á starfsemi félagsins. Þá sér í lagi þegar horft er til þess að félögum hefur fjölgað síðustu mánuði og má búast við því að þeim muni halda áfram að fjölga á næstu misserum," segir í tilkynningu FÍSN.

Fram kemur að íslenski söfnuðurinn í Osló hafi verið FÍSN afar hliðhollur og boðist til að veita félaginu skrifstofu til afnota en Guðrúnarstofa hefur að geyma eitt stærsta íslenska bókasafn í Noregi og ýmsar minjar um sögu FÍSN og frá tíð Guðrúnar Brunborg. Það sé hinsvegar augljóst að sú skrifstofa muni á engan hátt fylla skarðið eftir Guðrúnarstofu.