Askan rauk á Sólheimasandi þegar starfsmenn Landgræðslunnar hófu þar sáningu í gær til að reyna að hefta gjóskufokið. mbl.is/Jónas Erlendsson.

Landgræðsla ríkisins, með stuðningi Vegagerðarinnar og heimamanna, hefur hafið aðgerðir til að hefta öskufok á Sólheimasandi í Mýrdal. Tilbúinn áburður verður borinn á og grasfræblöndu sáð og er vonast til þess að árangur sjást strax í sumar.

Takist aðgerðirnar mun gróðurinn sem upp kemur draga verulega úr öskufoki á sandinum og tryggja öruggari umferð á þjóðveginum. Þetta kemur fram á heimasíðu Langræðslunnar.

Sólheimasandur er meðal þeirra svæða sem urðu hvað verst úti af völdum öskufalls í eldgosinu í Eyjafjallajökli á dögunum. Tilgangurinn með aðgerðunum nú er að endurheimta að einhverju leyti lífsgæði íbúa á þessu svæði, auka möguleika til áframhaldandi búsetu og tryggja betur umferðaröryggi á Sólheimasandi. Verkið verður unnið að stærstum hluta af heimamönnum en starfsmenn Landgræðslunnar hafa umsjón með því.

Í ár verður sáð í um 400 hektara, en um er að ræða hluta af stærri viðbragðsáætlun. Þá er nauðsynlegt, segir Landgræðslan, er að grípa til aðgerða á mun fleiri svæðum á láglendi, s.s. á Skógasandi og við Svaðbælisá og Markarfljót, ef takast á að hefta eða a.m.k. draga úr öskufoki í byggð. Hefur landgræðslan mótað ákveðnar tillögur um hvernig staðið skuli að uppgræðslu og endurreisn á þessu svæði og mun umhverfisráðherra leggja þær fyrir fyrir ríkisstjórn á næstu dögum.