Rúmlega helmingur vill kjósa innan sex mánaða

Rúm 50% þeirra sem tóku þátt í skoðanakönnun MMR vilja alþingiskosningar innan 6 mánaða. 31% svarenda telja að efna eigi til alþingiskosninga í lok kjörtímabilsins.

Í könnun MMR þar sem spurt var um afstöðu fólks til þess hvenær ætti næst að ganga til alþingiskosninga sögðu 40,9% svarenda að kjósa ætti til Alþingis innan þriggja mánaða. Þá voru 12,4% sem sögðu að kjósa ætti eftir 3-6 mánuði, 7,7% vildu kosningar eftir 6-12 mánuði og 8,6% sögðu að kjósa ætti eftir rúmlega ár (á árinu 2012). Þá voru 30,7% sem sögðu að kjósa ætti í lok núverandi kjörtímabils.

MMR gerði sambærilega könnun dagana 20.-21. janúar 2009, nokkrum dögum áður en tilkynnt var um síðustu alþingiskosningar. Þá kom í ljóst að 61,1% svarenda vildu alþingiskosningar innan 6 mánaða, samanborið við 53% nú. Í janúar 2009 voru 14,4% svarenda á því að næstu alþingiskosningar færu fram í lok þáverandi kjörtímabils - samanborið við, eins og áður greinir, 30,7% nú.

Sjálfstæðismenn og stuðningsmenn Hreyfingarinnar vilja kjósa fljótlega

Áberandi munur reyndist á afstöðu svarenda til tímasetningar næstu alþingiskosninga eftir því hvaða stjórnmálaflokka þeir myndu kjósa ef gengið væri til kosninga nú. Flestir stuðningsmanna Sjálfstæðisflokksins (69,7%) og Hreyfingarinnar (56,2%) vilja kjósa innan þriggja mánaða. Á móti vilja flestir stuðningsmanna Vinstri-grænna (88,3%) og Samfylkingarinnar (73,1%) kjósa í lok kjörtímabilsins.

Afstaða framsóknarmanna var nokkuð ólík afstöðu stuðningsfólks hinna flokkanna, rúmlega helmingur þeirra (52%) vill kosningar innan sex mánaða og tæplega helmingur vill kosningar eftir sex mánuði eða lengur. Þar af var um fjórðungur (eða 26,2% aðspurðra framsóknarmanna) sem vill að kosið verði í lok kjörtímabilsins.

Sjá nánar hér

• 1 blogg um fréttina

Bloggað um fréttina

• Óðinn Þórisson: Þjóðin vill kosningar